Орусиянын президенти Владимир Путин Украинанын түндүгүндөгү Сумы шаарын басып алуу ыктымалдыгын четке каккан жок. “Биздин андай максатыбыз жок, бирок негизинен мен муну четке какпайм», - деди Путин жума күнү Санкт-Петербургдагы эл аралык экономикалык форумда.
Путиндин айтымында, Орусия Сумы облусунда чек арадан 12 чакырымга чейин “коопсуздук зонасын” түзүүгө аракет кылып жатат. “Алар (Украинанын Куралдуу күчтөрү) биздин Курск облусуна чейин кирип келип, кылмыштарды жасашты. Биз аларды кууп чыктык. Эми биз коопсуздук зонасын түзүүгө мажбур болуп жатабыз”, - деп айтканын “Настоящее время” каналы билдирди.
Сумы облусунун административдик борбору болгон бул шаарда согуш башталганга чейин 255 миңдей адам жашачу. Москва 2022-жылдан бери мындай ири шаарларды басып алган эмес. Толук масштабдагы баскынчы аракеттер башталгандан бери Орусияга Украинанын бир гана облустук борбору – Херсонду басып алуу мүмкүн болгон. Бирок кийинчерээк орус аскерлери ал жерден кайра артка чегинишкен.
Жумага караган түнү Одесса орус армиясынын жапырт соккусуна кабылды. Украинанын Чукул кырдаалдар кызматынын маалыматына караганда, орусиялык дрондор шаардагы ондогон жайга чабуул койгондо өрт тутанды, 10 киши, арасында куткаруучулар жараланды. Кийин прокуратура бир киши набыт болгонун билдирди.
Пилотсуз учактардын бири тийген төрт кабат үйдү өрт чалды, тургундарды куткарууга үлгүрүштү, бирок үч өрт өчүрүүчү жаракат алды.
Ошондой эле 23 кабат турак жайдын өйдөкү кабаттарында өрт болду. Ал жактан 600 кишини эвакуациялашты.
Жергиликтүү жетекчилик үйлөрдөн тышкары административдик имараттар, темир жол вокзалынын инфраструктурасы зыян тартканын билдирди.
Орусия түнкү чабуулду комментарийлеген жок. Буга чейин болгон ушул өңдүү соккулардан кийин алар аскердик өнөр жай ишканаларын бутага алганын айтып келишкен.
Харьковдо дрон чабуулунан төрт киши жабыркаганы маалымдалды. Бардыгы болуп, Украинанын Аба күчтөрү билдиргендей, 86 пилотсуз учак учурулуп, алардын 70и атып түшүрүлдү. Буга чейинки күндөрдө украин аймагы мындан көп дрондор менен аткыланган.
Турак жайлар талкаланып, карапайым кишилер каза таап жатканы менен Москва бутага аскердик жайларды алганын айтып келет.
Орусиянын президенти Владимир Путин Украинадагы согушту жөнгө салуунун "жолун" табууга жана украин мамлекет башчысы Владимир Зеленский менен ыктымал жолугушууга даярдыгын билдирди.
Муну менен катар ал олуттуу чегинүүгө баруу даярдыгын ишарат кылган жок жана Зеленскийди Москвада легитимсиз деп эсептешерин кайталады.
Шаршембинин кечинде Санкт-Петербургдагы экономикалык форумда журналисттердин суроолоруна жооп бергенде орус президенти "азыркы жаңжалга гана чекит койбостон", келечекте да мындай кырдаалдын "пайда болушун алдын алуучу чечимдерди кабыл алуу керектигин"айтты.
Путин мындай билдирүүнү Киевде апта башында урулган соккудан каза тапкандар 28 кишиге жеткен, жарадарлар 150дөн ашкан маалда жасады. 17-июнга караган түнү коюлган чабуулдан турак жайдын бир подъезди урап калган.
Associated Press агенттигинин кабарчысы буга байланыштуу суроо бергенде, Путин бутага аскердик заводдор алынганын, мындай чабуулдар уланарын, себеби башкы максат “Украинанын демилитаризациясы” экенин айтты. Москва, көптөгөн далилдерге карабай согуштун башынан бери карапайым элди аткылабаганын айтууда.
Орус президенти 22-июндан кийин Киев менен сүйлөшүүлөрдү жандандыруу тууралуу кеңешүүлөр жүрүп жатканын кошумчалады.
Зеленский баш калаага урулган соккуну “ачыктан-ачык терроризм” деп атап, ал үчүн Путинди айпытаган.
Орусия басып киргенден бери Украинада, БУУнун маалыматына караганда, 13 миңден ашуун карапайым кишинин өмүрү кыйылды. Алардын көбү орус аскерлеринин ракета жана дрон чабуулдарынан каза тапкан. Өлкөнүн расмий өкүлдөрү жайкын украиндер арасындагы жоготуулар мындан көп деп айтышат.
17-июнга караган түнү урулган соккудан Киевде 14 адам каза таап, 114ү жабыркады. Одессагы орусиялык дрондор чабуул койду. Бирөө каза таап, калгандары уранды астынан изделүүдө.
